تەق تەق و گەشتیاری
زێی بچووك شادەماری گوزەران و فراوانبونی تەق تەقە ،ئاوێكی شیرینەو پلەی سوێری گۆمی (دوكان)نزیكەی (173 ملیگرامە لەیەك لیتردا)و پلەی گەرمی ئاوەكانی هەرێم (20)پلەی سەدییە لە هاویندا ئەمەش بۆ مەلەوانی دەست دەدات.
بەفیرۆ چونی ئاوی زێی بچووك بە هۆی كرداری دزە كردن و بەهەڵمبون (0،09 ملیار م3) یە لەماوەی سالێكدا ،سەرباری ئەمانە ئاو سەرچاوەیەكی گەشت و گوزاری سەرەكیە و چەندەها چالاكی گەشت و گوزاری پێیەوە بەستراوە وەك ( مەلەكردن خلیسكانێ لەسەر ئاو ، گەڕان بەناو ئاودا بەبەلەم ،وەرزشی سەوڵ لێدان ،ڕاوەماسی ...هتد ، زێی بچووكیش بنەمایەكی بنەڕەتییە لە خۆشكردنی كەش و هەوا و پەیدابوونی پۆشاكی سەوزی ڕووەكی لە شارۆچكەی تەق تەق ،هەر لەبەر ئەمەشە دەبێـت گرنگی زێیەكە بزانرێت و ماستەر پلانی گەشت و گوزاری هاوچەرخانەی بۆ بكرێـت . ئەگەر كەنار زێی بچووك بە كۆڕنیش و گازینۆو خێوەتگای گەشت و گوزاری و شۆستەی رێك و پێك و پێپلیكانە و پەیژە هەر لە گۆمی (مام تەها)ەوە لەباشوریدا تاكو (شاخی قەلان) و لەوێوە بۆ گازینۆی گەشتیاری تەق تەق لەوێشەوە بۆ چەمی (كوێخا ڕەشید)دروست بكرێت ،لەگەڵ چەندین كەمپ و ئوتیلی حەوانەوە بۆ گەشتیاران ئەوا بێ گومان دەبێتە مەڵبەندێكی سەرنج ڕاكێش و دڵگیر .هەروەها سەرووی تەق تەق نێوان (چۆم حەیدەر) و (موخەڕەس) بە گوێرەی ڕووپێوی جیۆلۆجی لەبارە بۆ بنیاتنان و دروستكردنی (بەنداوی تەق تەق) هەڵبەت بەنداویش خۆی لە خۆیدا دەبێتە ناوچەیەكی گەشتیاری، بوونی دارستانە سنۆبەریەكان لە بەرزاییەكانی (بانە و ڕەقە و شێخ بایزو گردی حێمر و گردە سوورەكەی لای پرۆژەی ئاوی ( كۆیە – تەق تەق) تاوەكو ڕووباری كۆیە كە ساڵی 1978 بە ڕووبەری (200)دۆنم چێندراوە تێكرا ئەمانەش دێمەنێكی ڕازاوە دەدەن بە تەق تەق و گەشتیارانیش لە ناوەڕاست و خوارووی عێراق و ناوچەكانی تری هەرێم لە هاویندا وەك هاوینەهەوار سەردانی دەكەن، بەمەش هەم حكومەتی هەرێم و هەمیش هاوڵاتیانی تەق تەق سوودمەند دەبن لەو بازرگانیەی كە بە بازرگانی نادیار ناونراوە.
سەرچاوە - تەق تەق ،پەلكە زێرینەی كەنار زێی بچووك
هەموو ماڵپەر و دەزگایەكی ڕاگەیاندن ئازادە لە بڵاو كردنەوەی بابەتەكانی ماڵپەری قەزای تەق تەق، بەمەرجێك ئاماژەی بە سەرچاوەكە بكات